ПЕСНОПЕНИЯ НА КРЕСТНОМ ШЕСТВИИ (21.05.23)
ПЕСНОПЕНИЯ НА КРЕСТНОМ ШЕСТВИИ
21 мая 2023 года
Христос воскресе из мертвых, смертию смерть поправ,и сущим во гробех живот даровав. (3 раза)
Запевы:
Слава Тебе, Боже наш, слава Тебе.
Пресвятая Богородице, спаси нас.
Святый архистратиже Божий Михаиле, моли Бога о нас.
Святителю отче Николае, моли Бога о нас.
Святии новомученицы и исповедницы Церкви Русския, молите Бога о нас.
Святии священномученицы Николае и Иннокентие, молите Бога о нас.
Вси святии земли Новосибирския, молите Бога о нас.
Слава Отцу и Сыну и Святому Духу,
И ныне и присно и во веки веков. Аминь.
Воскресение Христово видевше,/ поклонимся Святому Господу Иисусу,/ Единому безгрешному./ Кресту Твоему покланяемся Христе,/ и святое Воскресение Твое поем и славим:/ Ты бо еси Бог наш,/ разве Тебе иного не знаем,/ имя Твое именуем./ Приидите вси вернии,/ поклонимся святому Христову воскресению:/ се бо прииде Крестом радость всему миру./ Всегда благословяще Господа,/ поем воскресение Его:/ распятие бо претерпев,// смертию смерть разруши.
Канон Пасхи
Воскресения день,/ пpoсветимся людие,/ Пасха Господня, Пасха:/ от смерти бо к жизни,/ и от земли к небеси,/ Христос Бог нас преведе,// победную поющия.
Приидите, пиво пием новое,/ не от камене неплодна чудодеемое,/ но нетления источник,/ из гроба одождивша Христа,// в Немже утверждаемся.
На божественней стражи, / богоглаголивый Аввакум / да станет с нами, и покажет/ светоносна Ангела,/ ясно глаголюща:/ днесь спасение миpy,/ яко воскресе Христос,// яко Всесилен.
Утреннюем утреннюю глубоку,/ и вместо мира песнь принесем Владыце,/ и Христа узрим, / Правды Солнце,// всем жизнь возсияюща.
Снизшел еси в преисподняя земли,/ и сокрушил еси вереи вечныя, содержащия связанныя, Христе,/ и тридневен яко от кита Иона,// воскресл еси от гpоба.
Кондак, глас 8-й
Аще и во гроб снизшел еси, Безсмертне,/ но адову разрушил еси силу,/ и воскресл еси яко Победитель, Христе Боже,/ женам мироносицам вещавый: радуйтеся,/ и твоим апостолом мир даруяй,// падшим подаяй воскресение.
Отроки от пещи избавивый,/ быв Человек,/ страждет яко смертен,/ и страстию смертное,/ в нетления облачит благолепие,// Един благословен отцев Бог, и препрославлен.
Сей нареченный и святый день,/ един суббот царь и господь,/ праздников праздник,/ и торжество есть торжеств:// воньже благословим Христа во веки.
Ангел вопияше Благодатней:/ Чистая Дево, радуйся! / И паки реку: радуйся! / Твой Сын воскресе / тридневен от гроба, / и мертвыя воздвигнувый; // людие веселитеся.
Светися, светися,/ новый Иepyсалиме:/ слава бо Господня / на тебе возсия,/ ликуй ныне,/ и веселися, Сионе! / Ты же, Чистая, красуйся, Богородице,// о востании Рождества Твоего.
| Запевы (см.1 стр.) |
Стихиры Пасхи
Да воскреснет Бог, и расточатся врази Его.
Пасха / священная нам днесь показася,/ Пасха нова святая,/ Пасха таинственная,/ Пасха всечестная,/ Пасха Христос Избавитель,/ Пасха непорочная,/ Пасха великая,/ Пасха верных,/ Пасха, двери райския нам отверзающая,// Пасха, всех освящающая верных.
Яко исчезает дым, да исчезнут.
Приидите / от видения жены благовестницы,/ и Сиону рцыте:/ приими от нас радости благовещения / воскресения Христова;/ красуйся, ликуй/ и радуйся, Иерусалиме,/ Царя Христа узрев из гроба,// яко жениха происходяща.
Тако да погибнут грешницы от лица Божия, а праведницы да возвеселятся.
Мироносицы жены,/ утру глубоку / представша гробу Живодавца,/ обретоша Ангела / на камени седяща,/ и той провещав им/ сице глаголаше:/ что ищете Живаго с мертвыми;/ что плачете Нетленнаго во тли;// шедше проповедите учеником Его.
Сей день, егоже сотвори Господь, возрадуемся и возвеселимся вонь.
Пасха красная!/ Пасха!/ Господня Пасха!/ Пасха всечестная / нам возсия! Пасха!/ Радостию друг друга обымем./ О Пасха!/ избавление скорби,/ ибо из гроба днесь/ яко от чертога / возсияв Христос,/ жены радости исполни, глаголя:// проповедите апостолом.
Слава Отцу и Сыну и Святому Духу, и ныне и присно и во веки веков. Аминь.
Bocкpeсения день,/ и просветимся торжеством,/ и друг друга обымем;/ рцем: братие,/ и ненавидящим нас / простим вся воскресением,/ и тако возопиим:/ Христос воскресе из мертвых, смертию смерть поправ, и сущим во гробех живот даровав.
Богородице Дево, радуйся, / Благодатная Марие, Господь с Тобою; / благословенна Ты в женах / и благословен Плод чрева Твоего, // яко Спаса родила еси душ наших.
Не имамы иныя помощи, / не имамы иныя надежды, / разве Тебе, Владычице. / Ты нам помози, / на Тебе надеемся, / и Тобою хвалимся; // Твои бо есмы раби, да не постыдимся.
Милосердия двери отверзи нам, / Благословенная Богородице, / надеющиися на Тя да не погибнем,/ но да избавимся Тобою от бед:/ Ты бо еси спасение // рода христианского.
Небесных воинств Архистратиже, / молим тя присно мы недостойнии, / да твоими молитвами оградиши нас / кровом крил невещественныя твоея славы, / сохраняюще нас припадающих прилежно и вопиющих: / от бед избави нас, // яко чиноначальник вышних сил.
Правило веры и образ кротости, / воздержания учителя/ яви тя стаду твоему/ яже вещей истина; / сего ради стяжал еси смирением высокая, / нищетою богатая, / отче священноначальниче Николае, / моли Христа Бога // спастися душам нашим.
Величаем тя, / Святителю отче Николае / и чтим святую память твою, / ты бо молиши за нас // Христа Бога нашего.
| Запевы (см.стр. 1) |